Annáll
Árið 2021 var viðburðaríkt á velferðarsviði og ýmis jákvæð skref tekin til að bæta þjónustu við íbúa Reykjavíkur. Heimsfaraldur Covid-19 setti vissulega svip sinn á árið líkt og árið á undan, en hápunkti var náð um sumarið, þegar fyrsta velferðarstefna Reykjavíkurborgar var samþykkt.
22. janúar
„Við höfum verið óskaplega einangruð“
Nokkur hundruð af skjólstæðingum heimahjúkrunar fengu á síðustu dögum janúarmánuðar heimsókn hjúkrunarfræðings sem hafði bóluefni við Covid-19 með í för. Margir sáu þá fram á bjartari tíma eftir mikla einangrun og séu fyrir sér aukin samskipti við sína nánustu.
29. janúar
„Ef mennskan er í fyrsta sæti verður allt auðveldara“
Þrír einstaklingar sem komu til Íslands í leit að nýju lífi og hafa reynslu af því að fá þjónustu í Reykjavík tóku til máls á Velferðarkaffi – morgunfundi velferðarráðs. Á árinu 2020 veitti Teymis umsækjenda um alþjóðlega vernd á velferðarsviði 433 einstaklingum þjónustu.
12. febrúar
Velferðarráð úthlutar 35 styrkjum fyrir 102 milljónir króna
Hagsmuna- og grasrótarsamtökum í Reykjavík voru í gær veittir 35 styrkir fyrir 102 milljónir, við úthlutun styrkja velferðarráðs. Alls bárust 68 umsóknir um styrki að upphæð rúmlega 292 milljóna.
16. febrúar
Flóttafólki í borginni tryggð sambærileg þjónusta
Félagsmálaráðuneytið og Reykjavíkurborg gerðu með sér samning um að Reykjavíkurborg veiti öllu flóttafólki sambærilega þjónustu, óháð því hvort um sé að ræða kvótaflóttafólk eða einstaklinga sem hlotið hafa alþjóðlega vernd hérlendis.
24. mars
Hertar lokanir og takmarkanir vegna COVID-19
Vegna hópsmita voru aðgerðir vegna Covid-19 hertar hratt og tóku gildi á miðnætti. Félagsstarf fyrir fullorðið fólk og matarþjónusta á félagsmiðstöðvum var takmarkað. Lögð var áhersla á að halda óskertri þjónustu við fatlað fólk og sótt um undanþágu vegna þess.
9. apríl
Mikill meirihluti eldri borgara telur heilsu sína góða
Mikill meirihluti eldra fólks í Reykjavík telur andlega heilsu sína frekar eða mjög góða, eða um 90%. Ívið færri meta líkamlega heilsu sína frekar eða mjög góða, eða 72%. Þetta mátti lesa úr nýrri könnun sem lögð var fyrir 1800 eldri einstaklinga, 67 ára og eldri á landinu öllu.
15. apríl
Aukið líf færist í félagsstarf eftir rýmkun á samkomubanni
Félagsstarf eldra fólks í Reykjavík færðist í eðlilegra horf. Það hafði verið skert vegna tíu manna takmarkana en var rýmkað á ný, þegar 20 manns máttu koma saman. Þá hófst matarþjónusta á ný en hún hafði einnig legið niðri.
21. apríl
Fjöldi fólks fékk fyrstu bólusetninguna við Covid-19
Mikilvægum áfanga var náð þegar fleiri en 300 einstaklingar sem fá þjónustu velferðarsviðs fengu fyrstu bólusetninguna við Covid-19. Í hópnum var fatlað fólk sem fær víðtæka þjónustu á vegum velferðarsviðs og gekk allt vel fyrir sig.
23. apríl
Rafvæðing fjárhagsaðstoðar verðlaunuð
Rafvæðing fjárhagsaðstoðar Reykjavíkurborgar hlaut tvenn silfurverðlaun og ein bronsverðlaun í alþjóðlegu hönnunarkeppninni Indigo Design Awards. Keppnin leggur áherslu á að verðlauna framsækna og spennandi hönnun.
26. apríl
Gott að búa við öryggi í eigin íbúð
Sex einstaklingar fengu íbúð í nýjum íbúðakjarna í Árbænum. Íbúðirnar sem tilheyra kjarnanum eru í nýjum og fallegum fjölbýlishúsum sem Félagabústaðir keyptu af Bjari íbúðafélagi fyrir hönd velferðarsviðs Reykjavíkurborgar.
7. maí
Hjólin tóku að snúast í Atvinnu- og virknimiðlun og Virknihúsi
Ráðið var í stöður sérfræðinga í Atvinnu- og virknimiðlun og Virknihús, sem tóku svo til starfa í byrjun júní. Í gegnum Atvinnu- og virknimiðlun er virkni- og vinnuaðmarkaðsgerðum komið í framkvæmd en í Virknihúsi er haldið utan um öll virkniúrræði velferðarsviðs.
15. maí
Eldra fólk fær kennslu í tölvuleikjum og snjalltækjanotkun
Annað árið í röð var farið af stað með tæknilæsinámskeið fyrir fullorðið fólk í Reykjavík. Slík námskeið voru haldin sumarið 2020 og vöktu mikla ánægju. Árið 2021 voru þau fleiri og sérhæfðari, svo sem tölvuleikjanámskeið og námskeið í notkun fjölbreyttra snjalltækja.
17. maí
Rótin hlýtur Mannréttindaverðlaun Reykjavíkurborgar 2021
Rótin, félag um konur, áföll og vímugjafa, hlaut Mannréttindaverðlaun Reykjavíkurborgar 2021. Verðlaunin eru veitt einstaklingum, félagasamtökum eða stofnunum sem hafa á eftirtektarverðan hátt staðið vörð um mannréttindi.
19. maí
Styrkja ungt fólk við að aðlagast á nýjum slóðum
Þrjú verkefni voru sett af stað á þjónustumiðstöðvum velferðarsviðs sem öll miða að því að bæta líf, auka virkni og bæta þjónustu við ungt fólk af erlendum uppruna á aldrinum 16 til 19 ára. Verkefnin þrjú hlutu styrk úr Þróunarsjóði innflytjendamála.
3. júní
Áframhaldandi aðstoð við heimilislausa af erlendum uppruna
Skrifað var undir áframahaldandi samstarfssamning við Barka-samtökin en verkefnið er samstarf félagsmálaráðuneytisins, Reykjavíkurborgar og Barka, pólskra samtaka sem veita stuðning og ráðgjöf við heimilislaust fólk af erlendum uppruna.
15. júní
Fyrsta velferðarstefnan samþykkt í borgarstjórn
Þjónustusvæði Reykjavíkurborgar verða fjögur, rafræn þjónustumiðstöð verður sett á laggirnar og þjónusta við börn og fjölskyldur efld. Þetta er meðal þess sem fyrsta velferðarstefna Reykjavíkurborgar leiðir af sér.
22. júní
Verkefni til að styðja við flóttafólk í uppeldi gefur góða raun
Ísland er á meðal fjögurra Evrópuþjóða sem sameiginlega standa að verkefni sem miðar að því að styrkja foreldra í hópi flóttafólks. Á rúmu ári fengu fjörutíu foreldrar fræðslu í gegnum SPARE-verkefnið hjá Reykjavíkurborg.
1. júlí
Aukið fjármagn í sálfræðiþjónustu fyrir börn
Borgarráð samþykkti 140 milljóna króna aukafjárheimild til tímabundinnar fjölgunar sérfræðinga, til að vinna úr áhrifum Covid-19 á börn og unglinga.
27. september
Könnun sýnir mikla ánægju með SELMU-verkefnið
Könnun meðal hjúkrunarfræðinga í heimaþjónustu sýnir mikla ánægju með verkefnið SELMU, sem samanstendur af hjúkrunarfræðingum og verkefnastjóra af velferðarsviði og læknum frá Heilsugæslu höfuðborgarsvæðisins.
15. október
Nýjum reglum fylgir aukið samráð
Borgarráð samþykkti nýjar reglur stoð- og stuðningsþjónustu fyrir fatlað fólk með langvarandi stuðningsþarfir og jafnframt reglur um stuðningsþjónustu sem miða að eldri borgurum. Nýjum reglum fylgir meðal annars aukið samráð við notendur um þjónustuna.
28. október
Aukinn stuðningur við fólk með heilabilun
Borgarráð samþykkti að hefja þróunarverkefni þar sem félagslegur stuðningur er veittur einstaklingum með heilabilun sem búa heima. Velferðarsvið fékk aukna fjárheimild upp á 36 milljónir króna á árinu 2022 til verkefnsins.
5. nóvember
„Við viljum að fólk finni að það er velkomið til Íslands“
Svokallaðir „sendiherrar“ gegna sífellt mikilvægara hlutverki við að miðla mikilvægum upplýsingum um íslenskt samfélag til landa sinna. Sendiherra fyrir samfélag Rúmena á Íslandi sagði frá hlutverki sínu á velferðarkaffi.
18. nóvember
Öflugri nærþjónusta við barnafjölskyldur í öllum hverfum
Borgarráð samþykkti á fundi sínum að innleiða verkefnið Betri borg fyrir börn í öllum borgarhlutum. Því fylgja umtalsverðar skipulagsbreytingar á bæði velferðarsviði og skóla- og frístundasviði, börnum til hagsbóta.
1. desember
Ellefu nýir stjórnendur ráðnir til starfa
Ellefu nýir stjórnendur voru ráðnir til starfa á velferðarsviði sem munu taka þátt í mótun velferðarþjónustu borgarinnar í samræmi við nýja velferðarstefnu, innleiðingu verkefnisins Betri borg fyrir börn og farsældarlög félagsmálaráðherra.
8. desember
Húsnæði og neyðarrýmum fyrir heimilislaust fólk fjölgað til muna
Á fundi velferðarráðs var umfangsmikil skýrsla um stöðu heimilislausra í Reykjavík kynnt. Í henni kom meðal annars fram að frá því í október 2019 hafi neyðarrýmum eða íbúðum ætluðum heimilislausu fólki verið fjölgað um 49.
22. desember
Flóttafólk frá Afganistan sest að í Reykjavík
Hópur flóttafólks frá Afganistan kom til Íslands skömmu fyrir jól og fékk flest þeirra heimili í Reykjavík. Í hópnum voru 22 einstaklingar og þar af 14 börn. Fjölskyldurnar fá umfangsmikinn stuðning og þjónustu frá starfsfólki velferðarsviðs Reykjavíkur.
29. desember
Neyðarstjórn velferðarsviðs virkjuð á ný
Undir lok árs var nauðsynlegt að virkja neyðarstjórn velferðarsviðs enn á ný, vegna mikils fjölda starfsfólks í einangrun og sóttkví. Langflest þeirra vinnur við umönnun af ýmsu tagi, eins og í heimaþjónustu, á búsetukjörnum og í gistiskýlum.
